ଅଗଷ୍ଟ 1ରୁ ବଦଳିବ ଏହି ସବୁ ନିୟମ…
UPI ବ୍ୟବହାରକରୀଙ୍କ ଉପରେ ନୂଆ ନିୟମ ଲାଗୁ କଲା NPCI । ଏବେ ଆପଣ ଗୋଟିଏ ଦିନରେ କେବଳ 50 ଥର ବାଲାନ୍ସ ଯାଞ୍ଚ କରିପାରିବେ
UPI ଆପ୍ ମାଧ୍ୟମରେ ବାରମ୍ବାର ବାଲାନ୍ସ ଚେକ୍ କରଛନ୍ତି କି ? UPI ବ୍ୟବହାରକରୀଙ୍କ ଉପରେ ନୂଆ ନିୟମ ଲାଗୁ କଲା ନ୍ୟାସନାଲ ପେମେଣ୍ଟ୍ସ କର୍ପୋରେସନ ଅଫ୍ ଇଣ୍ଡିଆ (NPCI) ।
ଯଦି ଆପଣ ଫୋନ୍ ପେ, ଗୁଗଲ୍ ପେ, ଏବଂ ପେଟିଏମ୍ ଭଳି ବିଭିନ୍ନ ଆପ୍ ମାଧ୍ୟମରେ ୟୁପିଆଇ ବ୍ୟବହାର କରୁଛନ୍ତି, ତେବେ ଏବେ କିଛି ସର୍ବାଧିକ ବ୍ୟବହୃତ ଫିଚର ସୀମିତ ହେବାକୁ ଯାଉଛି। ଲୋକମାନେ ଫୋନ୍ ଆପ୍ ମାଧ୍ୟମରେ ବାରମ୍ବାର ବ୍ୟବହାର କରୁଥିବା ସେବାଗୁଡ଼ିକ ଉପରେ ସୀମା ଲାଗୁ ହେବାକୁ ଯାଉଛି। ଏଥିରେ ବାଲାନ୍ସ ଯାଞ୍ଚ କରିବା, ଅଟୋପେମେଣ୍ଟକୁ ଅନୁମତି ଦେବା, କାରବାର ସ୍ଥିତି ଦେଖିବା ଇତ୍ୟାଦି ସେବା ଅନ୍ତର୍ଭୁକ୍ତ। ଏହା ପରେ, ୟୁପିଆଇ ପେମେଣ୍ଟ ଆପ୍ ବ୍ୟବହାର କରିବାର ଉପାୟରେ ଯଥେଷ୍ଟ ପରିବର୍ତ୍ତନ ଆସିବ ।
ଅଗଷ୍ଟ 1, 2025 ଠାରୁ UPI ବାଲାନ୍ସ ଯାଞ୍ଚ ଏବଂ ଅଟୋପେମେଣ୍ଟ ଉପରେ ନୂତନ ନିୟମ ଲାଗୁ କରିବାକୁ ଯାଉଛି NPCI । ଏବେ ଆପଣ ଗୋଟିଏ ଦିନରେ କେବଳ 50 ଥର ବାଲାନ୍ସ ଯାଞ୍ଚ କରିପାରିବେ ଏବଂ ପିକ୍ ସମୟରେ କୌଣସି ଅଟୋପେମେଣ୍ଟ ହେବ ନାହିଁ।
ସମସ୍ତ ଉପଭୋକ୍ତାଙ୍କ ପାଇଁ ଉତ୍ତମ ସେବା ପ୍ରଦାନ କରିବା ପାଇଁ NPCI ଏହି ପଦକ୍ଷେପ ନେଇଛି। ଆରମ୍ଭରେ କିଛି ଏହା ଅସୁବିଧା ହୋଇପାରେ, କିନ୍ତୁ ଦୀର୍ଘକାଳୀନ ଭାବରେ ଏହି ପରିବର୍ତ୍ତନ ବ୍ୟବହାରକାରୀଙ୍କ ପାଇଁ ଲାଭଦାୟକ ପ୍ରମାଣିତ ହେବ ବୋଲି NPCI ପକ୍ଷରୁ କୁହାଯାଇଛି ।
NPCI ମେ 21 ତାରିଖରେ ଏକ ସର୍କୁଲାର ଜାରି କରିଥିଲା । PSPs UPI ନେଟୱାର୍କରେ ଚାଲୁଥିବା 10 ଟି ସର୍ବାଧିକ ବ୍ୟବହୃତ ଆପ୍ଲିକେସନ୍ ପ୍ରୋଗ୍ରାମିଂ ଇଣ୍ଟରଫେସ୍ (API) ଯେପରିକି ବାଲାନ୍ସ ଯାଞ୍ଚ, ଅଟୋପେମେଣ୍ଟ ଆରମ୍ଭ କରିବା ଏବଂ ଟ୍ରାଞ୍ଜାକ୍ସନ୍ ଷ୍ଟାଟସ ଯାଞ୍ଚ କରିବାକୁ ସୀମିତ କରିବା ଉଚିତ। ଯଦି ଏହି ନିୟମଗୁଡ଼ିକ ପାଳନ ନ କରାଯାଏ, ତେବେ ସମ୍ପୃକ୍ତ ବ୍ୟାଙ୍କ ଏବଂ ସେବା ପ୍ରଦାନକାରୀଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି NPCI ପକ୍ଷରୁ କୁହାଯାଇଥିଲା ।
ନୂତନ ନିୟମ ଲାଗୁ ହେବା ପରେ, ଜଣେ ଗ୍ରାହକ UPI ଆପ ମାଧ୍ୟମରେ ଦିନକୁ କେବଳ 50 ଥର ବାଲାନ୍ସ ଚେକ୍ କରିପାରିବେ। ବାରମ୍ବାର ବାଲାନ୍ସ ଚେକକୁ ଏଡାଇବା ପାଇଁ, NPCI ପ୍ରତ୍ୟେକ ସଫଳ କାରବାର ସହିତ ଆକାଉଣ୍ଟ ବାଲାନ୍ସ ସୂଚନା ପଠାଇବାକୁ ବ୍ୟାଙ୍କଗୁଡ଼ିକୁ ନିର୍ଦ୍ଦେଶ ଦେଇଛି। ବିଶେଷଜ୍ଞମାନେ କହିଛନ୍ତି ଯେ, ଏହା ବ୍ୟବସାୟୀ ବର୍ଗଙ୍କ ପାଇଁ କିଛି ଅସୁବିଧାର କାରଣ ହୋଇପାରେ, କାରଣ ସେମାନଙ୍କୁ ବାରମ୍ବାର କାରବାର ସ୍ଥିତି କିମ୍ବା ବାଲାନ୍ସ ଯାଞ୍ଚ କରିବାକୁ ପଡ଼େ। କିନ୍ତୁ ଏହି ପରିବର୍ତ୍ତନ UPI ସିଷ୍ଟମକୁ ଅଧିକ ସ୍ଥିର ଏବଂ ସୁଲଭ କରିବା ଦିଗରେ ଏକ ପଦକ୍ଷେପ।
NPCI ସ୍ପଷ୍ଟ କରିଛି ଯେ, ପିକ୍ ଆୱାରରେ –ଯେପରିକି ସକାଳ 10 ରୁ ଅପରାହ୍ନ 1 ଟା ଏବଂ ସନ୍ଧ୍ୟା 5 ରୁ ରାତି 9:30 ପର୍ଯ୍ୟନ୍ତ – ଉପଭୋକ୍ତାଙ୍କ ଅନୁମତି ବିନା କୌଣସି API କାରବାର ହେବ ନାହିଁ।
ଅଟୋପେମେଣ୍ଟ ମଧ୍ୟ ସୀମିତ ହେବ
ଏବେଠାରୁ, UPI ଅଟୋପେମେଣ୍ଟ (ଯେପରିକି SIP, Netflix ଇତ୍ୟାଦି ପାଇଁ) କେବଳ ନନ୍-ପିକ୍ ଆୱାରରେ ପ୍ରକ୍ରିୟାକରଣ କରାଯିବ। ଅର୍ଥାତ୍ ଯେଉଁ ସମୟରେ UPI ବେସି ଟ୍ରାଞ୍ଜାକ୍ସନ ହୋଇନଥାଏ । ପ୍ରତ୍ୟେକ ଅଟୋପେମେଣ୍ଟ ପାଇଁ ସର୍ବାଧିକ ଥରେ ଏବଂ 3 ଥର ପୁନଃ ଚେଷ୍ଟା ଅନୁମତି ଦିଆଯିବ, ଏବଂ ତାହା ମଧ୍ୟ କେବଳ ନନ୍-ପିକ୍ ସମୟରେ।