ପୋଲିଶ ଜାଲରେ ୫ କୁଖ୍ୟାତ ଅପରାଧୀ
ସହରର ପେଟ୍ରୋଲ ପମ୍ପ, ଦୋକାନ, ବାସଗୃହରୁ ଡକାୟତି କରିବାକୁ ଉଦ୍ୟମ କରୁଥିବା ଏକ ଡକାୟତି ଦଳକୁ ରାଉରକେଲା ପ୍ଲାଣ୍ଟସାଇଟ୍ ପୋଲିଶ ଗିରଫ୍ କରି କୋର୍ଟ ଚାଲାଣ କରିଛି। ସମସ୍ତ ଅପରାଧୀ ଅନେକ ଗୁରୁତର ମାମଲାରେ ଜଡିତ ଅଛନ୍ତି ବୋଲି ପୋଲିଶ ପକ୍ଷରୁ ସୂଚନା ଦିଆଯାଇଛି। ଡକାୟତି ଉଦ୍ୟମ କରୁଥିବା ବେଳେ ପୋଲିଶ ଶୀଘ୍ର କାର୍ଯ୍ୟାନୁଷ୍ଠାନ ଗ୍ରହଣ କରିବା ସହ ଘଟଣାସ୍ଥଳ ଉପରେ ଚଢାଉ କରି ମାରାତ୍ମକ ଅସ୍ତ୍ରଶସ୍ତ୍ର ସହିତ ୫ ଜଣ ଅଭିଯୁକ୍ତଙ୍କୁ ଗିରଫ କରିଛି। ଗିରଫ ଅଭିଯୁକ୍ତ ଏବଂ ଅପରାଧୀଙ୍କ ମଧ୍ୟରେ ଅଛନ୍ତି ଗୋପବନ୍ଧୁପାଲ୍ଲି ଓ୍ବାର୍ଡ ନମ୍ବର ୩ର ଶେଖ ସଲମାନ (୨୪), ରେଳବାଇ କଲୋନୀ ଇନ୍ଦିରା ନଗରର ପବନ ସାହୁ (୧୯), ଲାଲ ବିଲ୍ଡିଂ ଲେନର ଆୟୁଷ ବାଡା (୧୯), ଲାଲ ବିଲ୍ଡିଂ ଲେନର ରୋହିତ ପ୍ରସାଦ ଓରଫ କାଲୁ (୨୦), ମାଲଗୋଦାମ କାଳୀ ମନ୍ଦିର ଲେନର ମହମ୍ମଦ କୈଫ (୧୯) ଏଥିରେ ଅନ୍ତର୍ଭୁକ୍ତ। ଅଭିଯୁକ୍ତଙ୍କ ଠାରୁ ତିନୋଟି ଲୁହା ରଡ୍, ଗୋଟିଏ ଭୁଜାଲି ଏବଂ ଗୋଟିଏ ଛୁରୀ ଜବତ କରାଯାଇଛି। ପୋଲିଶର ସୂଚନା ଅନୁଯାୟୀ, ଅଭିଯୁକ୍ତମାନେ ନିକଟବର୍ତ୍ତୀ ଘର, ଦୋକାନ, ପେଟ୍ରୋଲ ପମ୍ପ ଏବଂ ପଥଚାରୀଙ୍କୁ ଟାର୍ଗେଟ କରି ଡକାୟତି ଯୋଜନା କରୁଥିଲେ। ଗିରଫ ହୋଇଥିବା ପାଞ୍ଚ ଜଣ ଅଭିଯୁକ୍ତ ବହୁ ଗୁରୁତର ଅପରାଧିକ ମାମଲାରେ ୱାଣ୍ଟେଡ୍ ଅଛନ୍ତି। କେବଳ ପ୍ଲାଣ୍ଟସାଇଟ୍ ଥାନାରେ ଶେଖ ସଲମାନଙ୍କ ବିରୁଦ୍ଧରେ ଡଜନ ଡଜନ ମାମଲା ରୁଜୁ ହୋଇଛି, ଯେଉଁଥିରେ ଡକାୟତି, ଚୋରି ଏବଂ ହତ୍ୟା ଉଦ୍ୟମ ଭଳି ଗୁରୁତର ଅପରାଧ ଅନ୍ତର୍ଭୁକ୍ତ। ସେହିପରି ଅନ୍ୟ ଚାରି ଜଣ ପବନ, କାଳୁ, ଆୟୁଷ ଏବଂ କୈଫଙ୍କ ବିରୋଧରେ ରାଉରକେଲାର ବିଭିନ୍ନ ଥାନା ଅଞ୍ଚଳରେ ସଙ୍ଗଠିତ ଅପରାଧ, ଚୋରି, ଆକ୍ରମଣ, ଧମକ ଏବଂ ଅସ୍ତ୍ରଶସ୍ତ୍ର ଆଇନ ଅନୁଯାୟୀ ମାମଲା ରୁଜୁ ହୋଇଛି। ପୋଲିଶର ଦ୍ରୁତ ଏବଂ ସାହସିକ କାର୍ଯ୍ୟାନୁଷ୍ଠାନ ଯୋଗୁଁ ସହରକୁ ଏକ ବଡ଼ ଅପରାଧିକ କାର୍ଯ୍ୟକଳାପ ରୋକିବାରେ ଆସ୍ବସ୍ତି ମିଳିଛି।